Life is Colorful =)

GC – Day 1 & 2

طبعاً ما كنا مخططين للسفر ولا شي على اساس انه السمر كورس بيخلص اخر شهر ٧ و بيكون ماشي باقي عن رمضان! فـ جيه يوم من الايام أنا و محمد يالسين انسولف، جان يقولي ياخي ليش ما انسير ماليزيا! قلتله يالله ماعندي مشكله خل الكورس يخلص و بنسير بس انته رتب من احين .. نفس اليوم فليل الساعه ١٢ أنا خلاص أبا ارقد! اشوف التلفون يرن (صامت التلفون طبعاً) المهم اقول حق حمود ها خير حصلت شي ولا ؟ رد و قالي : شرايك انسير استراليا!! قلتله ها! صدق والله تبا تسير !؟ قالي هيه عادي ،، قلتله يالله رتب كل شي وانا جاهز!

المهم اول شي يلسنا اندور جان حد بيسير معانا، مب حلوه انسير الا ٢ -.- اخر شي حصلنا خليفة و سالم بيسيرون معانا .. وانا عاد من زمان ما شفتهم لا سالم و لا خليفه! من خلصنا الثنويه!!

ازين و يوم السفر كان تاريخ ٢٨/٧ و احنا مخلصين الفاينل ٢٦/٧! طيارتنا كانت اظن الساعه ١٠ و شي من مطار دبي .. طبعاً احنا كلنا في العين، و يوسف ماقصر خطف علينا الصبح جيه عـ الساعه ٧ اظن و حركنا صوب دبي.

وصلنا المطار و حمدالله انه احنا كنا مسووين الجيك-ان اونلاين فـ ما طولنا فالإجراءات و خلصنا كل شي بسرعه و اظن كان باقي عن الطياره نص ساعه .. محد كان متريق و زين انه حصلنا كوستا مره عند البوابه اللي لازم انكون عندها .. تريقنا و اونه مستعيلين و يوم حدرنا نسمع انه بنتأخر ١٥ دقيقه عشان شي تفتيش امني عـ طياره سعوديه فـ المدرج -.-

و ركبنا الطياره و كل واحد يلس و اللي شغل الايباد و اللي تم يطالع موفي عـ الشاشه اللي جدامه و اللي خذا بندول نايت!! مدة الطيران كانت ١٤ ساعه يعني كنا لازم نوصل مطار بريزبين الساعه ٦ الصبح بتاريخ ٢٩/٧!! يعني كملنا يوم كامل فالطياره! لانه انطير عكس حركة الشمس فـ بالنسبه النا يوم ٢٨/٧ خطف علينا و إحنا فالطياره. المهم كنا لازم نوصل الساعه ٦ صح ؟ بس بسبب الضباب هناك تحولت الرحله صوب ملبورن لين يعتدل الجو فـ بريزبن! و بعد هاللفه الطويله وصلنا مطار بريزبن الساعه ٩:٣٠ الصبح! تقريباً ١٧ ساعه فـ الجو -.-

وصلنا و احنا خلاص هلكانين و حمدالله اجراءات المطار خلصناها بسرعه و طلعنا من المطار و ركبنا واحد من هالتكاسي الكبار و حركنا صوب الـ غولد كوست. الدرب تقريبا ساعه يعني حمدالله ماطولنا وايد و وصلنا الـ سيركل اون كافيل ،، عطونا مفاتيح الحجر و سرنا حطينا الشنط و كل ثنين اختارو حجره ،، أنا و خليفه ،، محمد و سالم ،، تعبانين و هلكانين لكن ما رقدنا!! طبعاً من اليوع! سرنا تحت اندور مطعم حلال ناكل منه، طبعاً اول يوم و لا نعرف شي هناك ،، قلنا بنسير ناندوز ،، يوم وصلنا عنده انه زحمه! شفنا عداله سب واي، قلنا يلا ميتيين يوع و مافينا اندور مطعم غيره، تغدينا و سرنا نتمشا عشان انعرف شو عدالنا، و بعدين تمشينا شوي عـ السيف (الشاطي) و بعدها رجعنا الشقه و كل واحد ضربها رقده لين المغرب! انا اوني ما برقد بتم واعي لين فليل! استوت جيه ٣:٣٠ اظن قلت برقدلي ساعه، حطيت المنبه الساعه ٤:٣٠ و رقدت فالصاله لانه بعدهم ما يابولنا سرير زياده حق سالم ،، نشيت ع المنبه، قلت يمكن احصل حد واعي، اطالع يمين يسار محد بعدهم العالم رقود، قلت خلني اكملها رقاد لين المغرب (٥:٣٠).


يوم نشيت بعد المغرب حصلت خليفه واعي، و محمد و سالم بعدهم رقود ،، قالي قوم بنسير ناخذلهم عشا ،، سرنا مطعم اسمه “علي بابا” ،، شفناه يوم كنا نتمشا الصبح ،، خذنا من عنده شوارما ،، عاد كل وحده ولا سندويش سب واي!! و خذنا كولا و رجعنا الشقه و حصلنها حمدالله واعيين ،، يلسنا فـ البلكونه و الجو بااارد و تعشينا و ريحنا شوي.

طلعنا نتمشا شوي بعد هـ العشا ،، استوت الساعه ١١ فليل ،، محمد و سالم رجعو الشقه و أنا و خليفه سرنا اندور جمعيه ناخذلنا الاغراض اللي نباها ،، حصلنا اكثر عن وحده عالدرب بس عيبتنا وحده مكتوب عـ الباب يدل على انه الاشياء اللي عندهم حلال ،، خذنا اللي نباه من ماي و شاي و حلاوه و مره كل شي نباه ،، رجعنا الشقه و رتبنا الاغراض و رقدنا من وقت هاليوم.


ها كان اليوم الاول و الثاني في الرحله، اول يوم خطف و إحنا فـ الطياره و اليوم الثاني رقااد + حواطه عشان نعرف شو عدالنا. السموحه عاد هاليومين ما صورت واايد! ما كان لي نفس اصور اصلاً مادري ليش -.- بس الايام اليايه صورنا لين ما قلنا بس!

احس انه الخلفيه السودا و الكلام ابيض فـ صعب انه ينقرا! و الخط اظن طالع صغير -.- اغير الثيم ظنكم ؟

3 responses

  1. Yaaaa7yho walla, ma sha2alla 3leekm :)
    Ahm shy enkom estansto ..

    Altheme ma3leeh rmsa , Gd
    Bs el5a6 5lani a7wal hhhh

    Waiting ur new (f)

    17/08/2010 at 12:47 AM

    • trah el font ma agdar a’3ayrh!
      thats why ymkn a’3yr el theme

      Thanks ^_^

      17/08/2010 at 5:31 AM

  2. iMariam

    Aham shay enkoum ‘3ayrtoo jaw w estanasto :D
    Loved the post entry wayed . . & the pics are AMAZING mashallah <<<3333

    waithing 4 more . . . !
    el theme ma3leeeh klam ;D, bss shwya 93ba el grayya!

    20/08/2010 at 2:26 PM

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s