GC – Day 3
اليوم الثالث هو كان بداية رحلاتنا فـ الغولد كوست! المهم هاليوم خليفه نش اول واحد ،، قبل ما يرقد اليوم اللي قبله سألني عن الشروق متى ؟ طبعاً الايفون ما قصر ،، قلتله انه الشروق جيه تقريبا عـ الساعه ٥:٣٠ ،، عاد هو ضبط المنبه و أنا بعد ضبته عـ تلفوني عشان انش نصلي الفير ،، خليفه نش و صلى و تم لين ما طلعت الشمس
أنا الا تميت انش و ارد ارقد لين ما استوت ٨ الصبح ،، اسمعهم محتشرين فالصاله ،، عرفت انهم كلهم واعيين ،، نشيت عاد اوني بسرعه و سرت اخذلي شور و تمسحت و صليت الفير.
هاليوم كنا متفقين نسير الـ موفي وورلد ،، كنا حاجزين التذاكر امس فليل قبل ما انرد الشقه ،، المهم كل واحد اتجهز و نزلنا تحت و عاد قررنا هاليوم الريوق يكون في زرافه كوفي
كانت اول تجربه إلنا في هـ الكوفي ،، كل واحد خذله كروسان جبن و اللي خذله كبتشينو و لاتيه و أنا خذتلي هزلنت ،، الهزلنت مالهم طعمه أحلى عن مال ستاربكس بوااايد ،، خذنا طاوله خاري عشان نحس بالجو اونه ،، جو نظيف و مهب بارد! عاد و إحنا يالسين قلنا بنعبي الورقه اللي عاطينا اياها مع التذاكر ،، استوت الساعه ٩:٣٠ و قلنا بنحرك صوب الباص اللي يودي الـ موفي وورلد ،، اول مره نجرب الباص بس والله كانت تجربه حلوه! افتكينا من السواقه و عوار الراس والله
وصلنا الـ موفي وورلد و وقفنا فـ الطابور ،، ما طولنا وايد لين دخلنا لانه كان يوم عادي مب الويكند ،، يوم دخلنا عطونا خريطه للمكان عشان نعرف مكان الالعاب و العروض ،، دخلنا الا جيه تمينا نمشي
شفنا انه شي عرض للسيارات بيبدا بعد ١٥ دقيقه ،، قلنا يلا بنحدر نطالعه ،، دخلنا و يلسنا عـ المدرجات نتريا العرض
كان من أحلى عروض السيارات اللي شفتها!
طلعنا من المدرجات و شفنا الخريطه عشان نعرف شو العروض و الألعاب اللي عدالنا ،، المهم قلنا بنتمشى و اذا شفنا شي عيبنا بنحدره ،، اول شي عـ دربنا لعبة “سكوبي دو” و هي عباره عن قطار الموت جيه بشكل مصغر بس فـ الظلام! ما حدرنا اللعبه هالوقت لانه مره وقفوا الدخول من وصلناهم
قلنا ما عليه بنكمل الحين و احنا طالعين انشالله بنحدرها ،، تمشينا شوي و حصلنا بوث مال التصوير ،، اونه مال الـ كاو بوي و جيه ،، تصورنا و خذنا صورنا اللي متنا ضحك عليهن ،، كملنا مشي و يتنا لعبة اسمها وايلد ويست فولز ،، حلوه اللعبه بس اخر شي كل واحد خذله رشة ماي محترمه ،، اول شي أنا و سالم ما طعنا نركبها قلنا مافينا نخرس ماي! فـ خليفه و محمد حدروا بدونا! طلعوا من اللعبه و عاد هنيه بدا الغياظ ،، اونه فاتتكم اللعبه فناااانه! عاد أنا و سالم قلنا عيل لازم نجربها ،، صدق صدق استانسنا فيها والله من أحلى الألعاب اللي لعبتهن هناك
طلعنا منها و احنا رادين شفناهم فاتحين بوابة لعبة سكوبي دو! روعه هاللعبه والله ،، قطار الموت فـ الظلام! وين تحصلونها هاي ،، بعد ما خلصنا هاللعبه كان شي جيه عروض و خرابيط ،، سرنا ناخذ ايس كريم و تمينا نطالع العروض ،، بعدها سرنا صوب لعبة سوبر مان ،، و اللي عباره عن قطار الموت لكنه سرييييع! من صفر لين ١٠٠ في ثانيتين بس!!! والله كان خاطري اجربها! حمود و خليفه بس اللي ركبوها
هاي كانت اخر محطه إلنا فـ الموفي وورلد ،، طلعنا من هناك و سرنا نتريا الباص لين ما وصل ،، و خلصنا مغامرات هاليوم
تجربة الباص والله شي حلو ،، تسير مع الناس و ترجع معاهم ،، يعني تحس انك سويت شي يديد
كالعاده وصلنا الشقه كل واحد سار يرقدله شوي لين المغرب ،، بعد المغرب نزلنا تحت نتمشا و يلسنا شوي فـ ستاربكس و بعدها سرنا نتمشا عـ السيف لين ما عيزنا و فـ الدرب خطفنا الدكان ناخذ اللي نباه و رجعنا الشقه و انتهى ثالث يوم فـ الرحله
الفيديو من تصوير الايفون ٤
Yaaaay!!
the pix are <33
7abait el mkanwayd .. aba aseeer :'(
20/08/2010 at 2:30 PM
Awesome photos mashallah!
I loved the first one, mainly because of the pink sky. I heart pink skies. Always take photos of pink skies lol. I want one for me! lol jk. ok enough with the pink skies I said “pink skies” a lot haha! xD
You should’ve tried the roller coaster looks freakishly fun haha! Would love to go there someday. Hope you had fun! Thanks for sharing!
03/10/2010 at 11:25 PM